Mitohy hatrany ny fanadihadiana sy ny fikarohana an’ilay lehilahy mpiasan’ny banky iray ao Ambovombe nangalatra vola 335 tapitrisa Ar tao anaty vatamafihidy, ny alatsinainy teo. Mivoatra tsikelikely ny famotorana, tao anatin’izany no nahatrarana olona telo (ny rainy, ny dadatoany, ny anabaviny) akaiky azy. Nifandray matetika tamin’ilay lehilahy mpiasan’ny banky izy ireo.
Mipetraka ao Antanimora Atsimo izy telo, voasaringotra tamin’ity raharaha ity. Fantatra tao anatin’ny famotorana lalina nataon’ny zandary fa anisan’ireo nifampiresaka tamin’ilay mpiasan’ny banky izy ireo tamin’ny fotoana nisian’ny halatra tao amin’ny banky. Mitohy ny famotorana sy fikarohana ilay mpiasa, nanao mpamosavy malemy. Tsy mbola tratra izy. Mbola manjavona ihany koa ny volabe nangalariny. Marihina moa fa hita tao anaty Caméra de surveillance ny fihetsika rehetra nataony tamin’ny fanatanterahana io halatra tao amin’ny toeram-piasany io.
J.C
French