Olona efatra niara-namoy ny ainy teny Ambohimangakely. Vokatry ny fifandonan’ny fiara tsy mataho-dalana sy taksiborosy, ny alin’ny 31 aogosotra teo.
Fiara tsy mataho-dalana nifandona tamin’ny taksibrosy teo amin’ny PK 10+ 100, fokontany Behitsy, kaominina Ambohimangakely, afakomaly. Nandeha mafy ny fiara 4×4 iray. Tsy nahafehy ny fitaovana nentiny ny mpamily kinanjo nifatratra tamin’ny taksiborosy iray. Avy any Antsirabe nikasa hihazo an’i Toamasina io taksiborosy io. Potika tanteraka ny fiara roa nifandona. Nifamonjena ireo naratra. Nidina nanome tanana ireo niharan-doza ny mpitandro filaminana sy ny mpitsabo avy eo anivon’ny CSBII Ambohimangakely. Natao ny fizahana ireo voa mafy. Vokany, ankizivavy vao 5 taona sy zazalahy iray niara-maty. Ankoatra ireo, renim-pianakaviana iray sy vehivavy 27 taona avy any Fianarantsoa koa maty nandritra io loza io.
Tsy fitandremana
Nandritra ny fanadihadiana lalina nataon’ny zandarimaria Ambohimangakely no naharenesana fofona zava-pisotro mahamamo tamin’ny mpamilin’ ilay 4×4. Nanararaotra nandeha mafy tamin’ny lalana tsara koa izy ka antony nahatonga ny voina. Nentina namonjy toeram-pitsaboana avokoa ireo naratra mafy tamin’ity fifandonana ity. Notsiahivin’ny zandary manao ny famotorana fa tsy miaraka velively ny fisotroana sy ny familiana. Matetika tsy fitandremana ataon’ny mampiasa lalana no miteraka loza anatin’izao fiafaran’ny vanim-potoana fialantsasatra izao.
Tsiferana R.
French