Hotanterahina rahampitso, eny amin’ny Kianja Makis Andohatapenaka, ny andro fahadimy, fiadiana ny ho tompondakan’i Madagasikara, taranja rugby, “XXL Top 12”, federaly I. Anisan’ny lalao tena andrasan’ny maro, amin’izany, ny fihaonan’ny FTM Manjakaray sy ny TFMA Ankasina.
Mbola manala vela amin’ity fifanandrinana ity ny mpilalaon’Ankasina, boay kely manohitra. Tsiahivina fa ny 17 marsa lasa teo, teny Andohatapenaka ihany, lavon’ny FTM tamin’ny isa 33 no ho 28, ny Boay kely manohitra. Ho toy ny famaranana kely ity fifandonana ity, ny ekipan’ i Manjakaray no laharana amin’ny “Top 12”, ary fahatelo kosa ny TFMA.
Mialoha ity lalao ity, hifandona amin’ny USA Ankadifotsy ny ekipan’ny Savony STM.
Tsara ny mampahatsiahy fa ny ekipan’ny FTM no tompondakan’i Madagasikara, farany teo, ary tsy mbola resy mihitsy izy ireo hatramin’ny nanombohan’ny fifanintsanana tamin’ity taom-pilalaovana 2024 ity. Ankoatra izay, hisy lalao ho an’ny vehivavy, diviziona faharoa, izay hihaonan’ny XV Red Tanjombato sy ny Fanja Anjanahary.
Fitia Randria
Ny fandaharan-dalao rahampitso :
11 ora : 3FB vs FTBA
1 ora : USA vs STM
3 ora : FTM vs TFMA
French