Niverina nisokatra ny 11 septambra teo, ny Birao ifoton’ny fananan-tany (Bif) ao amin’ny kaominina Mahitsy, rehefa nakaton’ny fanjakana ny 21 jona 2019. Tsy afaka nikarakara ny taniny ny tantsaha nandritra ny 5 taona, araka izany. Afaka miasa indray ny birao, ankehitriny, noho ny ezaky ny ben’ny Tanàna, Tiana Elvis. Miisa 483 ny tantsaha nahazo karatany ao amin’ny kaominina.
Nambarany, nohamarinina ireo antontan-taratasy rehetra efa nataon’ny mpitantana ny Bif teo aloha. Nangonina ny fitaovana ilaina ary naverina amin’ny laoniny ny kisari-tany avy amin’ny zanabolana ao amin’ny kaominina (Plof).
Notsindrin’ny ben’ny Tanàna fa, « fahavalon’ny fananan-tany ny dahalo ambony latabatra sy ny mpanefoefo, ka vahaolana manampy ny tantsaha ny lalàna vaovao, milaza fa tsy azo hakana titra ny tany raha tsy efa manana karatany”.
Nilaza Ramanandraisoa Elisabeth, fa tena ilaina ny karatany, ahafahana mamboly tsy misy ahiahy. Manentana ny mpiray monina izy handoa hetra satria marisarisa ny mponina hatramin’ny 2019 noho ny mankaty noho ny fikatonan’ny Bif. Afaka manatona ny biraon’ny Bif ny rehetra haka ny karataniny, manomboka anio 13 septambra. Na koa manao fangatahana ho an’ izay tsy mbola manana.
Njaka A.
French