Tsara ny fanemorana ny fe-potoana farany fametrahana ny antontan-taratasy firotsahan-kofidina, raha ny fanehoan-kevitry ny depiote voafidy tany Sainte Marie tamin’ny anaran’ny Irmar, Imbiki Herilaza, omaly, manoloana ny hiafaran’izany eny anivon’ny Ovec, anio. Nohalavaina hatramin’ny 26 septambra izany, araka ny tolo-kevitry ny Ceni. Ny vahoaka no tokony hahay ny olona hofidiny amin’ny fifidianana manakaiky azy. Aleo hitovy tantana ny kandidà ny olona rehetra: mba hanan-jo hirotsa-kofidina avokoa ny Malagasy rehetra mahafeno fepetra. Zava-dehibe ny fifidianana kaominaly sy monisipaly. Amin’ny fisafidianana izay ho kandidà: misy kandidà mahaleo tena, izay tsy voatery ho mpanohitra. Tsy mahazo fanendrena avy amin’ny antoko na vondrona izy, nefa te hanompo ny kaominina misy azy. Misy koa ny kandidà ao anatina vondrona na antoko politika. Ny zava-dehibe ary araka ny hetahetan’ny vahoaka malagasy dia miainga avy any aminy izay atao kandidà: zatra mifanosina aminy, mahafantatra ny maharary azy, efa zatra manampy vahoaka sy manao asa sosialy.
R. Nd.
French