Notanterahana teto Madagasikara ny fivoriam-be iraisam-pirenena Africa 50. Fantatra fa firenena 28 nahazo famatsiam-bola. Misitraka izany ny tetikasa volobe.
Tontosa omaly, teny amin’ny ivon-toerana fandraisana fivoriana iraisam-pirenena na CCI Ivato, ny Africa 50. Fivoriamben’ireo firenena mikambana ao anatin’ny vondrona. Manatrika izany ko any mpiara-miombon’antoka maro eo amin’ny sehatry ny fananganana fotodrafitrasa. Tetikasa lehibe misy fiantraikany mivantana amin’ny fampandrosoana miisa 25, avy amina firenena 28, no nahazo famatsiam-bola tao anatin’izany.
Anisan’ny mpisitraka i Madagasikara, amin’ny alalan’ny famatsiam-bola ho fanatanterahana ny tetikasa Volobe. Tetikasa hananganana tohodrano lehibe hamokatra herinaratra any Toamasina II. Notsindrin’ny filoha Rajoelina Andry ny anjara asa lehibe ananan’ny vondrona Africa 50, indrindra ny tahirim-bolany, ho fanafainganana ny fotodrafitrasa, amin’ny fanatanterahana ny tetikasa angovo ho an’ny rehetra. Toy izany ny fampandrosoana ny indostria ary ny fanatsarana ny fari-piainan’ny mponina aty Afrika.
Vita sonia
Vita sonia, omaly ny fifanaovan-tsonia momba ny tetikasa Volobe. Herinaratra manana tanjaka 120 Mw no andrandraina. Hamatsy an’i Toamasina, Antananarivo, Alaotra Mangoro hatrany Vakinankaratra. Mitantana ny tetikasa ny orinasa CGHV Compagnie générale de l’hydroélectricité de Volobe (CGHV). Anisan’ny mpiara-miombon’antoka ny Africa 50, ny Jovena (Groupe Axian), ny Colas, sns.
Tafiditra ao anatin’ny famahana ny olan’ny herinaratra eto Madagasikara ny tetikasa. Hampitombo 20% ny famokarana herinaratra izany. Nialohan’ny fifanarahana, nisy ny fifandresen-dahatra nataon’ny filoham-pirenena Rajoelina Andry. Tanjona ny hampidinana ny sandan’ny herinaratra hitsinjovana ny mpanjifa.
Hanomboka ny taona 2028 ny famokarana ny herinaratra avy amin’ny reniranon’ Ivondro, Volobe.
Lin
French