Tontosa ny faran’ny herinandro teo, teny amin’ny kianja mitafon’i Mahamasina, ny fiadiana ny tompondakan’ Analamanga, taranja karate. Mpikatroka 200, avy amin’ny seksiona 8, no tonga nandray anjara nandritra izany, ka niady ny tompondaka. Tafakatra avy hatrany hiatrika ny fiadiana ny ho tompondakan’i Madagasikara, hatao any Toliara, ireo tompondaka isaky ny sokajy, nandritra ity fifaninanana rezionaly ity, raha ny nambaran’ny eo anivon’ny ligin’Analamanga, taranja ny karate. Tonga nanotrona ny fifaninanana teny Mahamasina ny filohan’ny Federasiona ny karate-do malagasy, Ratefinanahary Emile, izay nidera manokana ny ligin’Analamanga. “Nivoatra be ny fikarakarana, izay tena nanara-penitra tokoa, niakatra ihany koa ny haavo teknikan’ny mpikatroka eto Analamanga”, hoy ny nambaran’ity filohan’ny FKM ity. Fandaharam-potoana manaraka miandry ny karate malagasy ny fiadiana ny tompondaka maneran-tany hatao any Italie. Hiatrika ny fiadiana ny ho tompondakan’i Madagasikara kosa, ny faran’ny volana oktobra izao, izay hatao any Toliara.
Mi.Raz
French