Nitrangana haintrano indray tao Tanambao Mananjary, afakomaly. Tokantrano miisa 52 no levon’ny afo, 218 ireo tsy manan-kialofana. Voalaza fa mpianatra avokoa ny 82 amin’ireo niharam-boina ireo. Anisan’ireo levon’ny afo ny fiara efatra, moto iray ary entana maro mitentina an-tapitrisa tao amin’ireo tokantrano. Ahitana olona marefo ihany koa amin’ireo niharam-boina (vehivavy bevohoka, zokiolona, vehivavy mampinono). Niainga avy ao amina tokantrano iray ny afo ka niitatra tamin’ireo trano rehetra teo amin’ny manodidina. Nijoalajoala ny afo, ary anisan’ny nampananosarotra ny famonoana izany ny trano vita amin’ny hazo sy ireo entana mora mirehitra. Olona roa no fantatra fa may ka iray naratra mafy saingy efa nahazo fitsaboana tao amin’ny Hopitaliben’i Mananjary. Napetraka vonjimaika ao amin’ny gradin, Kianja fanaovam-baolina ao an-toerana, ireo fianakaviana tsy manan-kialofana.
J.C
French