Nosokafana omaly, teny amin’ny toeram-pianarana teknika eny Mahamasina, ny taom-piofanana 2024-2025, niarahana tamin’ny minisitra mpiahy, Rasoloarisoa Marie Marcelline, sy ny mpiara-miasa aminy.
Nampahatsiahivin’ny minisitra ny mpianatra sy ny mpiofana fa tsy diso safidy izy ireo nanatona ny toeram-panofanana teknika satria miankina amin’ny fahaiza-manao entin’izy ireo eny anivon’ny tontolon’ny asa ny fampandrosoana ny toekarena. Hamorona asa sy harena ny mpianatra mahavita fiofanana ary tanjona ny tsy hialan’izy ireo an-daharana mandritra ny taom-pianarana. Fomba fiasa nentin’ny minisitra hitondrana ny minisitera sahaniny ny fananana fijery hafa. Ny minisitera no manatona ny vahoaka manontany ny filany sy ny talentany azo hamoronana lalam-piofanana vaovao. Manampy izany ny tetikasa fanorenana fotodrafitrasa vaovao sy fanitarana lalam-piofanana vaovao araka ny filana tsy mivaona amin’ny vina fampananana asa ny tanora sy fampiofanana mendrika. Amin’ny ankapobeny, 75% ny tahan’ny fidiran’ny mpianatra eny amin’ ny ny sekoly teknika sy ny toeram-panofanana momba ny asa. Tsapa kosa fa mbola misy faritra somary ambany ny taha raha mihoatra amin’ny fianarana hafa, araka ny fanazavany ihany.
Nahandro sy taovolo
Nitsidika ny toeram-panofanana teknika eny Tsimbazaza koa ny minisitra, omaly ihany. “125 ny mpiofana zakan’ny foibe ary matetika voatery manda fisoratana anarana ny tomponandraikitra satria voafetra ihany ny efitrano sy ny fitaovana ampiasaina”, hoy ny talen’ny toeram-panofanana momba ny asa, Razakaboana Bakolinirina.
Afaka manaraka fiofanana avokoa ny olon-drehetra rehefa mahay mamaky teny sy manoratra. Fianarana informatika, mahandro, manjaitra, taovolo, mikarakara zaridaina ny lalam-piofanana atolotra. Ny nahandro sy ny fandraisam-bahiny ary ny taovolo no be mpisafidy indrindra. 10 ny mpampiofana ao amin’ny foibe ary maharitra telo volana ny fifehezana ny lalam-piofanana tsirairay. Niforona ny taona 2016 ny foibe ary anarivony ny mpiofana nisitraka fiofanana arakasa tao, tsy anavahana na lahy na vavy.
Vonjy
French