Niady lavaka: telo lahy maty tototry ny tany

Olona telo niara-maty tototry ny tany tao amin’ny distrikan’i Tsaratanàna, afakomaly. Niezaka nanavotra ny fokonolona fa tsy tana ny ain’izy ireo.

Nifampisokirana tao ana­ty ranontany ireo telo lahy nihotsahan’ny tany tao amin’ny tanànan’Ambeda­mena, fokontany Betafo, kaominina Ambakireny, distrikan’i Tsaratanàna, afakomaly. Nia­sa io tany io hanaovana lalan-drano ho any amin’ny tany hamboleny ireto lasibatra ireto, araka ny angom-baovao voaray avy amin’ny mpitandro filaminana miasa ao an-toerana. Nihotsaka tampoka anefa ny tany. Tampoka, tsy nisy tafavoaka tao anatin’ny lavaka ireto telo lahy. Niantso vonjy tamin’ny mponina manodidina ny nanatri-maso. Niezaka nangady ny tany nanototra ireo olona telo ireo sy namoaka ireto farany tao anatin’ny lavaka.

Adiny fito …
Nananosarotra ny fanesoran’ny fokonolona ny ranontany nanototra ireo mpiady tany. Nanomboka tamin’ny 10 ora maraina izy ireo no niezaka nikaroka ny vatana mangatsiakan’izy telo lahy. Tafa­voaka tao anatin’ny tany avokoa ireo olona telo tamin’ny 5 ora hariva saingy tsy nisy avotra intsony ny ain’izy ireo. Nanao ny fitsirihana ny vatana mangatsiaka ny tomponandraikitra. Niroso tamin’ny fanadihadiana ny raharaha ny zandary miasa any an-toerana. Fantatra fa mponina ao Ambakireny avokoa ireto tra-doza ireto.

Tsiferana R.