Nitokana ireo fotodrafitrasa any amin’ny distrikan’Ambanja ny minisitry ny Fitsinjaram-pahefana sy ny fanajariana ny tany, Andriantsitohaina Naina. Anisan’ny nisitraka izany ny ao amin’ny kaominina Ambalahonko, Antsakoamanondro ary Maherivaratra. Notokanana ny herinandro teo ny trano fianarana, ahitana fitaovana samihafa, toy ny EPP sy ny CEG. Eo koa ireo trano fidiovana sy ny vovondrano fisotro. Namatsy vola izany ny fanjakana sy ny fiaraha-miasa amin’ny mpiara-miombon’antoka Alemà (KfW), ao anatin’ ny fandaharanasa PDCID, tanterahin’ny FDL. Miisa 21 ireo sekoly notolorana fitaovana ho an’ny any amin’ny faritra Diana sy Boeny, tamin’ity taona 2024 ity. Miisa 11 kosa ny fotodrafitrasa an-dalam-panavaozana. Ahitana birao, tranompokonolona sy fotodrafitrasa madinika eny anivon’ny kaominina miisa 40. Tafiditra anatin’ilay tetikasa PDCID KfW II.
Fanoratana tany faobe
Etsy andaniny, nizara drafitra ifoton’ny fanajariana ny tany iraisan’ny kaominina (SAIC) sy Paloss ho an’ny kaominina miisa 9 any Sambirano ihany koa ny minisitra, ka nanamafy ny fandrindrana ny fampandrosoana voafehy sy azo antoka.
Tsiahivina fa nisitraka fanoratana tany faobe koa ny any Antsiranana II, ny herinandro teo. Miisa 351 ireo tokantrano nahazo izany ka tonga tany an-toerana nizara ny taratasy ny minisitra Andriantsitohaina Naina. Nohamafisiny hatrany fa natao ho an’ny Malagasy ny tany.
Synèse R.
French