Hatao manomboka ny 14 oktobra izao, ny fiofanana “Fiba Afrika Youth Camp 2024”, taranja basikety. Manana solontena efatra mianadahy i Madagasikara.
Nampahafatarin’ny Federasiona malagasy, tamin’ny alalan’ny filohany, Ramaroson Jean Michel, ny talata lasa teo ireo tanora efatra mianadahy hisolo tena an’i Madagasikara mandritra ny fiofanana karakarain’ny Fiba Afrika miaraka amin’ny NBA. Mpanazatra sy Teknisiana maro avy amin’ny Fiba Afrika sy NBA no hizara fahaiza-manao, fampianarana teknikan’ny Basikety ary fanazaran-tena sy fanomanana ara-batana ho an’ireo mpilalao tanora latsaky ny 18 taona. Federasiona afrikanina maro no manana solontena amin’ity fiofanana ity.
Raha ny fandaharam-potoana, ny 14 hatramin’ny 17 oktobra 2024, any Douala Cameroun no hanatanterahana ny Fiba Africa Regional Youth Camp ho an’ny sokajy zazalahy. Manana mpilalao miisa 2 hiatrika izany i Madagasikara. Ny 21 hatramin’ny 24 oktobra ho avy izao any Abidjan Côte d’ivoire kosa, ho an’ny sokajy zazavavy izay handraisan’i Madagasikara anjara ihany koa, amin’ny alalan’ny mpilalao miisa 2 miampy mpanazatra iray.
Hahafahan’ireo mpilalao basikety malagasy maka traikefa sy misokatra amin’ny sehatra iraisam-pirenena, ny fiofanana toy izao. Tanora voafantina no miatrika izany, raha ny fanazavana hatrany.
Mi.Raz
Ireo solontena malagasy 4 mianadahy
1-HANAFFY Ivan Abdoul (JSB Boeny )
2-RAKOTOZAFY Tsiory Ulrick (ASSM Analamanga)
3-RASOARINIAINA Tantely (FANDRASA Matsiatra Ambony)
4-RABENIAMINA Kaloniaina Tiffany (MB2ALL Analamanga )
Mpanazatra: RALAIVAO Felana
French