Fetin’ny Repoblika : hisy velakevitra arahina seho hataon’ny Kolontsaina Mainty

Mandray andraikitra amin’ny fiainam-pirenena ihany koa ny mpanakanto. Ho tohin’ireo hetsika efa fanaony, hankalaza ny andron’ny 14 oktobra, « Fetin’ny Repoblika », ireo mpanao rap mivondrona ao amin’ny Kolontsaina Mainty.

«Eh, avia aloha ma­nabokona atidoha, fa ny fahantrana ara-tsaina, hoy aho, mitarika ny fahantrana ara-bola ihany koa a». Fanen­tanana nataon’i Bolo na Ra-Loob io. Maha­kasika ny fanamarihana ny andron’ny 14 oktobra, ny alatsinainy izao, izany. Andro lehibe sy manan-tantara ka tsy avela handalo fotsiny izy ity, ho an’ireo mpanakanto mivoy ny rap gasy, ao anatin’ny vondrona Kolon­tsaina Mainty. «Fetin’ny Repoblika» rahateo ny anaran’ny hetsika, izay hotontosaina eny amin’ny ADMC / Craam Ankatso.
Hizara roa ny fotoana ka ny maraina manomboka amin’ ny 9 ora dia hatokana ho an’ny velakevitra arahina adihevitra. «Ny atao hoe fanjakana sy Repoblika» ny lohahevitra voalohany hovelabelarin’ny profesora Jaqueline Ravelo­manana, mpampianatra tantara sy lalàna, sy Ranovona Andriamaro, mpampianatra sosiolojia politika. Hanaraka avy eo ny «Tantaran’ny hiram-pirenena», izay azo antoka fa hahaliana ny maro. Hamarana ny velakevitra ny Hip Hop any Etazonia, izay hozarain’i Qwincy, mpanao rap, mpikambana ao amin’ny Da-Hopp. Arahina seho kely hataon’i Epistolier izany.
Seho ampitain-davitra na «virtual concert» kosa ny hariva manomboka amin’ny 7 ora, izay hifarimbonan’ireo mpanakanto mpanao rap maro, toa an’i Big Tovolah, Eklyps, MBL, Bolo, Mashmanjaka, Nephes­ch Ta’an, Saboodak, Tommy Montana, Vercors, Yrist, Lyrikal Jill, Sonar, Geoscar, Khym’s Ogami, Balz, sns. Hitrotro izany ny Dj Mister T. Handeha mivantana amin’ny pejy facebook an’ny Kolon­tsaina Mainty sy Zaza Rap Taiza ny seho.

Marihina fa efa namoaka ilay rakikira niarahana «Re­pob­lika» ireto mpanakanto ireto, ka azo alaina maimaimpoana ao amin’ny kolontsainamainty.com izany, amin’io fotoana io. Rakikira natao hanairana sy hitondran’ireo mpanao rap ny fijeriny ny fiarahamonina sy ny tontolo politika ilomanosan’i Madagasi­kara izy ity, izay nivoaka tamin’ny taon-dasa.

Zo ny Aina