Telo taona ny zandriny indrindra amin’ireo zaza miisa fito naolan’ny lehilahy iray. Tratra tao Mahajanga ity farany ary notanana am-ponja.
Voasambotry ny polisim-pirenena avy eo anivon’ny fitaleavam-paritra Boeny ny lehilahy iray nanolan-jazavavy miisa fito tao amin’ny fokontany Antanamalandy, kaominina Mahajanga, ny 11 oktobra teo. Anisan’ny nananan’ny fianakaviana fahatokisana ity lehilahy ity ka nalefa natory tany aminy matetika ireo zaza. Tsy hafa rahateo, vinantolahin’ny ray aman-dreny lehibe ihany io lehilahy voalaza io. Nihevi-dratsy, nanamparan’io tsy mataho-tody io ny filan-dratsiny avokoa ireo zaza ireo rehefa alina. “Tampenany ny vavako. Tsy avelany miteny fa tereny hanamparana ny filan-dratsiny”, hoy ny nambaran’ny iray tamin’ireo zaza lasibatra.
Rahonany ho vonoina
Taorian’ny fanolanana ataon’io lehilahy io ireo zaza ireo, rahonany ho vonoina izay mikasa hitati-dresaka amin’ny olona ivelany. Tereny hiray aminy tsotr’izao ireo zazavavy zanaky ny havany ireo. Zanany vavy ny iray. “Roa tamin’izy ireo no tena naolany ary nanaovany fihetsika mamoafady ny ambiny”, hoy ny fanazavan’ny polisy misahana ny fanadihadiana. Tsy zakan’ireo zaza intsony ny herisetra nianjady taminy ka niteny tamin’ny ray aman-dreniny izy ireo. Nitoroka teny anivon’ny polisy ny ray aman-drenin’ireo zaza miisa fito ireo, ny alatsinainy 7 oktobra lasa teo. Nanao ny fanadihadiana ny polisy ka tratra izy. “Toetra mamohehitra tsy fampiseho masoandro no nihatra tamin’
ireo zazavavy ireo”, hoy ny fanazavan’ny polisy miasa ao an-toerana. Tsiahivina, iharan’ny sazy enjana, vosirina mihitsy aza, izay tratra manao habibiana tahaka ity lehilahy voasambotra tao Antanamalandy ity
Tsiferana R.
French