Nihena iray indray ny olon-dratsy ho an’ny eny amin’ny faritr’Antohomadinika sy ny manodidina. Jiolahy mpandroba amin’ny alina, maty voatifitra.
Jiolahy raindahiny amin’ny fanendahana mitam-piadiana lavon’ny polisim-pirenena teo Antohomadinika, ny alin’ny alakamisy 24 oktobra, tamin’ny 9 ora alina. Nihaodihaody teny amin’ny manodidina ireo olon-dratsy telo mirahalahy, nanomboka ny harivan’io andro io. Tsikaritry ny manodidina anefa ny fihetsiky ireo mpandroba ireo. Nilanja sabatra sy antsy izy telo lahy ka raiki-tahotra ny mponina. Niantso mpitandro filaminana ireto farany. Nanao be midina sy nanao vela-pandrika hanatrarana ireo olon-dratsy voalaza ireo ny polisy eo anivon’ny UIR sy CUI. Nanaraka ny lakandrano Antohomadinika izy telo lahy. Narahin’ny mpitandro filaminana maso akaiky ny fihetsiny. Nikoropaka nitsoaka ireo olona voatondro nandritra ny fifanjevoana. Namoaka ny sabatra teny aminy ny iray tamin’ireo jiolahy. Nikiry hanohitra ny polisy hisambotra azy izy ka lavon’ny tifitra. Nitsoaka nandositra ny roa lahy namany. Mitohy ny fikarohana azy ireo. Marihina, anisan’ny faritra mena amin’ny tsy fandriampahalemana, indrindra amin’ny andro alina, ny eny amin’ny manodidina an’Antohomadinika sy ny elakela-tranon’ny 67Ha tonga hatrany Andohatapenaka. Mitaintaina ny ankamaroan’ireo mponina mody alina eny an-toerana. Voakasik’izany koa, ireo mpandalo.
Tsiferana R.
French