Notanterahana, omaly, ny famerenana ny fihaonambe ho an’ny hoavy natao tany New York, ny 20 hatramin’ny 23 septambra teo. Teny amin’ny Foiben-toeran’ny minisiteran’ ny Raharaham-bahiny malagasy, teny Anosy, no natao izany. Nitarika ny fihaonana ny minisitry ny Raharaham-bahiny, Rasata Rafaravavitafika, notronin’ny mpandrindra mpisolo toerana eo anivon’ny Firenena mikambana, Josiane Yaguibou, sy ny masoivohon’i Alemana eto Madagasikara, Sem Olivier Knoerich. Nandray anjara mavitrika tamin’ izany ihany koa ireo tanora malagasy niatrika ny fihaonambe ho an’ny ho avy natao tany New York. Tanjon’izao fihaonana izao ny fijerena ny lahasa laharam-pahamehana ho an’i Madagasikara, indrindra ho an’ny tanora.
Fahombiazana ho an’i Madagasikara iny fihaonambe ho an’ny hoavy iny. Nahazo ako miabo i Madagasikara tao anatin’izany. Anisan’izany ny fandraisan’anjara mavitrik’ireo tanora tonga tany an-toerana, tamin’ny fitondrana ny feon’ny tanora malagasy amin’ny fanorenana hoavy mamiratra eo amin’ny sehatry ny fampandrosoana lovainjafy, ny fandriampahalemana ary ny fitantanana maneran-tany. Notsindrin’ny minisitry ny Raharaham-bahiny malagasy ihany koa fa misy ireo fifanekena natao nandritra iny fihaonambe iny, izay mikendry ny hahatontosan’ireo vina avy amin’ny feon’ireo tanora nandray anjara. Mifanindry an-dalana amin’izany ny vina sy ny fanamby apetraky ny fitondram-panjakana amin’ny fanomezan-danja bebe kokoa ny maha olona sy ny fampandraisana anjara ny tanora.
Lin
French