Ao anatin’ny fandraisana andraikitra ara-tsosialy (RSE) sy ho fikajiana ny tontolo iainana ary ho fanatsarana ny sehatry ny fanabeazana, nanolotra dabilio vita amin’ny fako plastika voahodina ho an’ny EPP Fitroafana Talatamaty, ny sabotsy teo, ny orinasa E-Toile, mpiara- miasa amin’ny vondrona Belge alsico sy ny Andao Company. Tanjona ny hanova ny fako plastika ho fanaka an-tsekoly lovain-jafy sy hanohanana ny fanabeazana ny ankizy. Mateza sy maharitra ireo dabilio vaovao ireo raha oharina amin’ireo vita amin’ny hazo sady manabe ny ankizy hahay hikajy ny tontolo iainana. Hampianatra azy ireo hanodina ny fako plastika ho akora azo ampiasaina sy ho loharanon-karena ihany koa ny tetikasa. Nisitraka izao fampitaovana izao ny efitrano fianarana miisa telo eo anivon’ny sekoly. Nahavitana dabilio 30 isa ho an’ireo mpianatra ao amin’ny ambaratonga fototra sy dabilio 8 sy seza 16 ho an’ireo kilonga ao amin’ny garabola ireo fako plastika voahodina milanja 948 kilao. Ankoatra izay, nanolotra fitaovana ho an’ireo mpianatra sahirana ihany koa ny mpitantana ny orinasa E-Toile, Bernard Iserentant. Nilaza izy fa « mifanaraka tanteraka amin’ny fandraisana andraikitra ara-tsosialin’ny orinasa, amin’ny alalan’ny fanohanana ny EPP Fitroafana, izao hetsika izao hanatsarana ny fanabeazana ny mpianatra ». Havaozina isan-taona ny hetsika, ka tanjona ny hampitaovana ny EPP Fitroafana amin’ny alalan’ny fako plastika voahodina.
Henintsoa H.
French