Fahasahiana mihitsy ny an’ireo jiolahy nanafika tokantrano iray teny Anosiala Ambohidratrimo, ny 1 novambra 2024 maraina. Nofatoran’ireo jiolahy ny tompon-trano ka nanjaka tanteraka izy ireo…
Jiolahy telo lahy nandroba tao amina tokantrano iray, tao amin’ny fokontany Ambatomena, kaominina Anosiala, distrikan’Ambohidratrimo, ny 1 novambra teo tamin’ ny 3 ora maraina. Nolavahan’ ny olon-dratsy ny tamboho. Nodidiany tamin’ny fitaovana manokana ny “grille de protection” teo amin’ny varavarankely. Anatin’ny torimaso, mora foana ho an’ireo nandroba ny nisambotra ireo fianakaviana tao an-trano. Nofatorana avokoa ireto farany. Nisavasava nanerana ny trano ary naka ny entana sarobidy ireo telo lahy. Voaroba ny firavaka, niampy finday niisa telo. Noterena hamoaka ny vola ny lasibatra. Vokany, nentin’ny jiolahy koa ny vola nitetina 1 200 000 Ar.
Lasany ny basy…
Ankoatra ireo, noraofin’ ireo telo lahy tsy nisy nisaron-tava ny ordinatera sy fakan-tsary. Nalain’ireo tsy valahara koa ny fitaovam-piadiana “Pistolet automatique” iray. Voaroba niaraka amin’ny bala “7,62 mm” miisa 20. Nampandre ny manam-pahefana avy hatrany ny lasibatra. Naka alika mpitsongo dia koa hanatrarana ireo nahavanon-doza. Hatreto, anatin’ny fanadihadiana ny mpitandro filaminana. Tsy misy ahina ny ain’ireo fianakaviana niharan’ny fandrobana. Nanana fotoana maharitra mihitsy ireo olon-dratsy nandoahana ny tamboho. Anisan’ireo faritra ahitana trangana tsy fandriampahalemana matetika ao amin’ny kaominina Anosiala, Ambohidratrimo, na eo aza ny ezaka ataon’ny mpitandro filaminana.
Tsiferana R.
French