Taolana niaraka tamin’ny akanjony sisa no nahafantarana ny tovovavy iray tsy hita nanomboka ny 30 oktobra 2024. Nahazo antso ny zandary avy ao amin’ny tobim-paritry ny zandarimariam-pirenena Fandriana fa misy taolam-paty hita miparitaka ao anaty ala kesika avaratry ny tanàn’Antanamahasoa, fokontany Sahanisotro, kaominina ambanivohitr’i Miarinavaratra, distrikan’i Fandriana, afakomaly maraina. Nidina ifotony ny zandary nanao fizahana ka taolana 10 no hita: taolan-tanana roa, sombin-taolan-karandoha iray, taolan-tratra dimy, taolam-pisaka amin’ny soroka havia sy taolam-balanorano. Nisy akanjom-behivavy iray koa hita niaraka tamin’ireo taolana ireo. Tamin’izany no namaritan’ny fokonolona mpiara-monina sy ny ray aman-dreniny fa tovovavy iray tsy hita ny faran’ny volana oktobra lasa teo ity taolana lena vao hita tamin’io fotoana io ity. Tsy fantatra izay antony nahafaty azy satria taolana vitsy sisa tavela ka nahafantarana azy. Voalaza fa tsy manana olona ahiahina amin’izao raharaha izao ny fianakaviany. Efa natolotra ny fianakaviany ireo taolambalo taorian’ny fizahana.
J.C
French