Shanghai Huiyou Investment Group : hampiasa vola 100 tapitrisa dolara eto Madagasikara

Hiasa eto Madagasikara ny orinasa sinoa Shanghai Huiyou Investment Group. Hitondra 100 tapitrisa dolara izy ireo, hanodinana ny vokatry ny fambolena.

Vita, omaly, ny fanaovan-tsonia fifanarahana eo amin’ny orinasa Shan­ghai Huiyou Investment Group sy ny Sekreteram-panjakana misahana ny Fahaleovan-tena ara-tsakafo eto Madaga­si­kara. Hiompana amin’ny tetikasa hiantohana ny fiandrianam-pirenena sy ny fampandrosoana maharitra an’i Mada­gasikara izany. Miten­tina 100 tapitrisa dolara ny fampiasam-bola. Tanjona ny hampiroborobo ny fanodinana ny vokatry ny fambolena, ny hanamafisana ny rojom-piharina. Ao anatin’izay ny fampitomboana ny fampiasam-bola ho an’ny seha-pamokarana sy ny famoronan’asa ary ny hampihena ny fahantrana.
Natao izao hanatrarana ny fanjarian-tsakafo eto amin’ny firenena. Voaresaka nandritra ny fihaonambe momba ny ady amin’ny hanoanana maneran-tany « World Without Hunger Conférence » tany Addis-Abeba-Ethiopie, ny herinandro teo, ny lafiny famokarana, ny fanodinam-bokatra, ny famatsiam-bola ary ny fampifandraisana ireo sehatra mpiara-miombon’antoka rehetra. Atao laharam-pahamehana ny fametrahana ny faritra fampiasam-bola indostrialy hanodina ireo vokatra (zones d’investissements agroindustrielles). Tanjona ny hampihena ny fahaverezam-bokatra aorian’ny fiotazana sy hifehezana ny tsena ary ny kalitao.

Fanamby
Vinam-panjakana ny ha­merina an’i Madagasikara ho sompitry ny vary aty amin’ny faritry ny ranomasimbe In­dianina sy i Afrika. Ilaina ny fananana politikam-panjakana sy paikady mazava ary fahaiza-mandridra ny andraikitry ny mpisehatra rehetra. Noho izany, nizara traikefa amin’ny ady ataon’i Madagasikara amin’ny tsy fanjarian-tsakafo ny Sekreteram-pankajana eo anivon’ny fiadidiana ny Repoblika misahana ny Fa­haleovantena ara-tsakafo, Razanamahefa Tahiana, nandritra ny fihaonambe. « Mila omen-danja ny fanovana ny sehatry ny fambolena, ny fanavaozana ny fitaovam-pambolena amin’ny alalan’ny fampiasana teknolojia moderina, ny fametrahana ny banky ara-tsakafo, ny fanomezana hanam-pamokarana toy ny masomboly tsara kalitao sy zezika ny tantsaha », hoy ny fanazavany. Atao laharam-pahamehana, hoy izy, ny fiaraha-miasa amin’ny sehatra tsy miankina.

Henintsoa Hani