Milanja 4 kg ny fitambaran’ ireo taolam-paty nisy nahita tao amin’ny fokontany Ambodivato II, kaominina ambanivohitr’i Tanamarina, distrikan’i Vavatenina, omaly tolakandro. Nahazo antso avy amin’ny sefo fokontany Ambodivato ny zandary ao amin’ny tobim-paritra Vavatenina momba ny fisian’ireto taolam-paty hita tao amin’ny toerana antsoina hoe Papaimena, 400 metatra atsimo atsinanan’ny tanànan’i Sahave II. Nidina teny an-toerana avy hatrany ny zandary niaraka tamin’ny dokotera avy ao amin’ny CSB2 Tanamarina ka voamarina tokoa ny fisian’ ny kitapo misy taolam-paty. Nandritra ny fitsirihana nataon’ ny zandary sy ny dokotera no nahitana fa kitapo miloko mavo misy taolam-paty milanja 4 kg no hitan’izy ireo. Taolan-dava sy taolam-pohy no hita tao anatin’io kitapo io. Taorian’ny fizahana nataon’ny zandary sy ny dokotera, nomena ny fokonolona sy ny Tangalamena ireto taolam-paty ireto. Niroso tamin’ny fandevenana ny taolana tao Analaratsy, fokontany Ambohidivato II, izy ireo. Tsy mbola fantatra aloha hatreto ny fasana nakana ireto taolam-paty ireto. Tsy nandrenesana vaky fasana rahateo teo anivon’ny fokontany raha ny fanazavana voaray avy amin’ny sefo fokontany. Mitohy ny fanadihadiana ataon’ny zandary momba ity raharaha ity.
Jean Claude
French