Fampielezan-kevitra : mampiakatra ny fandikan-dalàna ny Ceni

Manomboka anio ny fo­toan’ny fampielezan-kevitra amin’ny fifidianana ben’ny Tanàna sy mpanolotsain’ny Tanàna izay hatao amin’ny 11 desambra. Efa nisy ny kandidà nilaza sahady ny fisian’ny fampielezan-kevitra mialoha ny fotoana. Manoloana izany, manentana izay nahita sy nandre ny fandikan-dalàna ny Ceni mba hanao fitarainana eny amin’izy ireo.
Voakasik’izany koa izay mety ho fandikan-dalàna mandritra ny fampielezan-kevitra. “Manana andraikitra amin’ny firaketana izany an-tsoratra ny Ceni, ary mampiakatra izay endrika fandikan-dalàna izay any amin’ny fitsarana”, hoy ny fanazavan’ny mpampakate­nin’ny Ceni, Andriamarotafika Soava, teny Alarobia, omaly, raha nanontaniana ny amin’izay tokony hatao. Tsy azo atao, ohatra, izay mitovy
amin’izay voararan’ny lalàna amin’ny fotoana andavanandro, na misy na tsia ny fampielezan-kevitra: ny fanompana olona, ny fihantsiana, ny fanentanana hikorontana. Tsy azo atao izany mandavan-taona, vao mainka amin’ny fotoam-pifidianana. Voafaritry ny lalàna ny sokajin’olona tsy mahazo manao fampielezan-kevitra, araka ny fanazavany. Raha manao izany izy, tsy maintsy mametra-pialana. Toy ny fisian’ny minisitra nametra-pialana tamin’ny fifidianana filohan’ny Repoblika, fa nandray anjara tamin’ny fampielezan-kevitra izy ireo. Tsy tokony hiandany ny mpiasam-panjakana na inona na inona faharesen-dahatra ananany.

R. Nd.