« Mizara hafaliana », seho ho fanampiana sy fanatsarana ny fotodrafitrasa handraisana ny zanaky ny sahirana. Fa, seho hitondra hafaliana koa satria tarika sy mpanakanto sangany no handray anjara.
Antoko mpihira Miantsa magis, tarika Haga amin’ny endriny feno, Mamina Kanto Gasy sy Ravaka. Tarika sy mpanakanto samy miezaka ny hanandratra ny maha malagasy, haseho amin’ ny hira sy ny dihy no hifandimby eny an-tsehatra ao
anatin’ny « Mizara hafaliana ». Fampisehoana hotontosaina ao amin’ny CCEsca Antanimena, ny tolakandron’ny sabotsy 23 novambra izao.
Miantsa magis, antoko mpihira tarihin’ny mompera Jaonah (Fiadanana nentin’ iny), mijoro eo anivon’ny Ekar Md Joseph Bezaha Toliara. Ankoatra ny tononkira mifono hevi-dalina, mampiavaka an-dry zareo ny soradihy mirindra manaja fatratra ny soatoavina malagasy. Mivoy ireo karazan-kira sy gadona ary hira avy any amin’ny faritra atsimon’ny Nosy, tahaka ny tsapiky, mangaliba, beko, sns. Tarika Haga iray manontolo, hanasongadina ilay feo miavaka ahafahana mifehy karazan-kira maro. Anisany misongadina amin’ izany ny gadona mihetsiketsika avy eto afovoany sy avy any afovoany atsimon’ny Nosy. I Mamina Kanto Gasy sy Ravaka, fantatra amin’ilay fampiaraham-peo kanto sy mirindra.
Hanampiana ny sahirana
Mikarakara ny « Mizara hafaliana », ny fikambanana « Mahats’Art Madagascar » sy ny « Asa sosialy sy koltoraly ho antsika » (Aska) Farafan-gana. Izy ireo izay samy misehatra amin’ny fanampiana ny mpiara-belona amin’ny alalan’ ny fanomezana fampianarana azy ireo hiala amin’ny tsy fahaizana mamaky teny sy manoratra. Fanolorana fitaizam-panahy sy sakafo ho an’ny vatana. Ny hanatevenana ny kitapom-bolan’ireo fikambanana ireo hahafahany manatsara ny fotodrafitrasa handraisana ny zanaky ny sahirana tia fianarana sy fanabeazana (saina, vatana, fanahy), no antom-pisian’ity fampisehoana ity.
HaRy Razafindrakoto
French