Hanomboka anio ary hitohy hatramin’ny 23 novambra, ny fifaninanana «Open d’Afrique de Dakar», taranja Judo, tanterahina any Dakar. Tsy diso anjara amin’ity fifaninanana ity, i Madagasikara fa manana solontena 3 mirahavavy. Ahitana an’i Benandro Andriamahadiso Roumaica Riantsoa (Ica Rabesa), sokajy Juniors sy Seniors -57 kg, Ramorasata Idealisoa Miangalihanta, sokajy Juniors sy Seniors -52 kg ary Andrianjafintsalama Camille, sokajy Cadette sy Juniors -52 kg. Tsiahivina fa mianto-tena hatrany ny atleta malagasy amin’ izao fifaninanana goavana hatrehany izao. Nisy kosa ny antso fanohanana nataon’izy ireo ny malala tanana ka nahafahana nanampy ny hoenti-manana. Nandray anjara betsaka tamin’ izany, ny Judo Club Esca. Na izany aza, vonona ny handresy ny solontena malagasy ary hanandratra avo ny voninahi-pirenena na tsy jeren’ny tomponandraikitra aza.
Hanomboka hiakatra an-tsehatra rahampitso izy 3 miarahavavy ireto, eo amin’ny sokajy misy azy avy. Efa vita omaly kosa ny antsapaka sy fandanjana, vantany vao tonga tany an-toerana ireto solontenan’ny malagasy amin’ny “Open d’Afrique de Dakar” ireto.
Mi.Raz
French