Hetsika iray maro mpiandry amin’ity faramparan’ny taona ity. « Mozika mari-peo », iarahana mpanakanto telo samy nametraka ny anarany eo amin’ny tontolon’ny zavakanto malagasy.
«Tsiro telo mifanojo». Mahafehy ny endri-tsehon’ilay « Mozika mari-peo », hotontosaina ny 1 desambra izao, etsy amin’ny CCI Ivato izy ity. Tsikombakomba anaty mozika, iarahan’i Fanja Andriamanantena, i Silo ary i Rija Ramanantoanina izany. « Mety hahagaga anareo, fa sambany izahay telo mianadahy ireo vao ho tafaraka an-tsehatra amina seho iray. Mety efa matetika ny hoe izaho sy i Fanja, na izaho sy i Silo fa voalohany kosa ity fiarahana ity », hoy i Rija Ramanantoanina, nandritra ny fihaonana tamin’ny mpanao gazety, teny amin’ny Star Andraharo, omaly.
« Ny Louvto Company no nisafidy anay telo mianadahy. Mitovy fijery amin’ny mozika. Tsy mifanipaka ny fanona, na tsy mitovy aza fa samy manana ny hanitra ho azy. Mifameno tsara, satria samy mpamorona ary samy mpitendry. Hisy zavatra manokatra hasheo ao, ka ny antsany efa hitanay fa ny antsany ambiny kosa mbola matahotra ny mpankafy izahay », hoy hatrany i Rija.
« Raha ny tantara no hiverenana, tany amin’ny taona 90 tany no nampiantso ahy i Fanja hoe mba handrindra ny hirany iray. «Vita hatreo ny amintsika » io hira io. Nomeny ilay hira hoe « Mama » ao taorian’izay. Ny faramparan’ny taona 90 ihany koa no nisy mpanakanto nanatona ahy fa hanao ny rakikirany. Rija Ramanantoanina io, ary mpandrindra telo izahay no nantsoiny hanatontosa ny « Jamba » ; hoy kosa ny fitantaran’i Silo.
« Mpifanerasera amiko, efa amam-polo taonany maro izy mirahalahy ireto. Mozika no mampiray, mozika no iarahana na an-tsehatra na andavanandro. I silo izao tany amin’ny faha-14 taonany no nifanerasera tamiko, saingy izao vao hiaraka an-tsehatra izahay… », hoy kosa i Fanja Andriamanantena.
Tsy seho ifandimbiasana io, ka hoe ny sehatra sy ny mpijery no iraisana. « Tena hanome vahana ilay hoe kaonseritra, izay endri-tseho efa mitady tsy ho hita intsony izahay. Ilay mozika no tena mibahan-toerana fa tsy ny haingon-tsehatra. Somary misy lomano jazz kely ao, saingy tsy zato isan-jato akory », hoy hatrany i Rija Ramanantoanina.
Hira 30 eo ho eo no halahatr’ireto mpanakanto ireto mandritra ny seho. « Mozika mari-peo », satria hajaina sy hasongadina izay. Anisan’ny maneho izany ilay hira « Naleoko », sanganasan’i Tovo Andrianandraina, narindran’i Silo indray ka iarahany mamerina amin’i Fanja sy i Rija.
Zo ny Aina
French