SOMBIM-BAOVAO

Tafita hiatrika ny famaranana amin’ny
fiadian-toerana «Top 8», taranja rugby, ny Makis de Madagascar lehilahy. Omaly tany Maroc, lavon’izy ireo tamin’ny isa 33 no ho 7 ny liona tsy voafolak’i Cameroun. Hifandona amin’i Maroc, mpampiantrano ny Makis ny alahady ho avy izao.
Mieritreritra ny hanao tolotra iraisam-pirenena, hitadiavana mpanazatra hitantana ny Barea de Madagascar «A», ny Federasiona malagasin’ny baolina kitra (FMF). Tanjona amin’izany ny hitondra ny ekipam-pirenena any amin’ny fiadiana ny ho tompondaka maneran-tany «Mondial 2026».
Nanainga omaly nihazo an’i Etats-Unis d’Amerique, i Fitiavana Mickael. Hiatrika ilay fifaninanana fanabokonana hozatra “Muscle Mania” ny tovolahy. Hotanterahina ny sabotsy 23 sy ny alahady 24 novambra ho avy izao, izany fihaonana izany. Izy irery no solontena hiaro ny voninahi-pirenena.
Hotanterahina anio, etsy amin’ny Lapan’ny fanatanjahantena Mahamasina, ny lalao manasa-dalana hiadiana ny ho tompondakan’ny ranomasimbe Indianina, ho an’ny ekipa tompondaka taranja handball “senior”, lahy sy vavy. Adin’ny samy ekipa vahiny izany dingana izany fa tsy misy klioba malagasy tafita hiatrika ity lalao ity.