Nihazo an’i Mahajanga ny nofo mangatsiakan’i Rira. Niainga omaly, teto Antananarivo, ary notsenaina androany maraina, eny amin’ny sampanana Boanamary. Nifanentana ireo mpanakanto ao Mahajanga, hotronin’ireo mpankafy fa hisy ny fanomezam-boninahitra an’i Rira hataon’izy ireo, anio. Tsiahivina fa ny sabotsy teo no nodimandry rehefa tsy nahatosika ny aretina nikiky azy i Rira.
Anio no hitsenan’ny vahoakan’i Toamasina an’i Filamatra Matokia. Eny amin’ny Sarimasina, lalam-pirenena faharoa, ny ifampitaona izy ireo handray ity zanak’i Toamasina nanandratra avo an’i Madagasikara ity. Tsiahivina fa i Filamatra Matokia no nahazo ny laharana voalohany nandritra ny fifaninanana iraisam-pirenena “Our Generation” natao tany Rosia, ny 16 novambra teo.
Efa misokatra ho an’ny rehetra nanomboka omaly, ny fampirantiana «4 seasons» an’i Benjamin Loyauté, eny amin’ny Hakanto Contemporary Ankadimbahoaka. Fampirantiana maneho zavakanto mampifandray ny hita sy ny tsy hita maso. Olo-manan-kaja sy manam-pahefana maro no niatrika ny fanokafana izany. Anisany ny minisitry ny Serasera sy ny kolontsaina, Mara Volamiranty Donna.
French