Votsotra teny am-pelatanan’ireo malaso noho ny ezaka nataon’ny zandarimariam-pirenena nandritra ny fanarahan-dia ny zazavavy varira iray, ny alarobia teo. Tao Mahazoarivo, kaominina Elonty, distrikan’Amboasary Atsimo, no nahazon’ny zandary ity zaza ity rehefa nalain’ny dahalo antsokosoko tao Betroka. Nisy naka an-keriny tao Betroka, ny alin’ny zoma 8 novambra lasa teo, io zaza varira io. Araka ny fanazavan’ny zokin’io zaza io, nandritra ny tatitra nampitain’ny zandary, fianakavian’izy ireo ihany no tompon’antoka tamin’ity raharaha ity. Renoky ny torimaso izy ireo ka nobatain’ireo malaso voalaza ho fianakaviany io zazavavy io. Tao anatin’ny fahatapahan-jiro rahateo no nanararaotan’ireo olon-dratsy izany. Nanokatra fanadihadiana ny zandary avy ao amin’ny kaompania Betroka taorian’izay. Nanampy ny zandary koa ny Jado sy ny fokonolona ao an-toerana. Nahitam-bokany izany satria votsotra teny am-pelatanan’ireo malaso ilay zaza varira tao amin’ny fokontany Mahazoarivo.
J.C
French