Trano enina no may tao Analankininina Hopitalibe, Parcelle 12-21/22, afakomaly alina. Nitrangana fahatapahan-jiro matetika tao an-toerana ny alin’ny sabotsy hifoha ny alahady 1 desambra. “Indroa tapaka ny jiro. Nisy zavatra nirefotra tampoka taorian’izay”, hoy ny loharanom-baovao. Nirehatra ny trano iray ka nihitatra. Nahazo ireo trano nifanila taminy ny lelafo. Nikoropaka nivoaka ny trano ny lasibatra. Nanao izay ho afany namoahana ny entana izy ireo saingy nanao sarotra izany vokatry ny tanjaky ny afo. Vokany, lasa lavenona ny antontan-taratasy sarobidy rehetra an’ireo tokantrano enina voakasika. May koa ny entana noharian’izy ireo nandritra ny taona maro. Olona 30 nianjadian’ity haintrano ity. Voa mafy ireo mpianatra noho ny fitaovam-pianaran’ izy ireo kila tao anatin’ny indray mipi-maso.
Tsiferana R.
French