“Ny zava-dehibe dia izao: hampiakarintsika ny taham-bokatra eto Madagasikara. Amin’izay fotoana izay, mahazo mivelona tsaratsara ny vahoaka malagasy. Afa-miahy ny fianakaviana izy eo amin’ny lafiny fahasalamana sy ny fanabeazana, indrindra ny fiainana sy fihariana.” Izay no nambaran’ny Praiminisitra Ntsay Christian tany Fenoarivo Atsinanana, faritra Analanjirofo, afakomaly, tamin’ny fankalazana ny Androm-pirenena ho an’ny sakafo sy fanombohana ny fankalazana ny faha-20 taon’ny Ofisim-pirenena ho an’ny fanjarian-tsakafo (ONN). 39,8 % ny zaza latsaky ny dimy taona tratry ny tsy fanjarian-tsakafo mitarazoka manarena an’i Madagasikara. Manana vahaolana maharitra hampidinana izany ho 28,6% ato ho ato ny fitondram-panjakana. Anisan’ izany ny fampiakarana ny taham-bokatra. Tsy vary fotsiny, fa vokatra rehetra misy eto Madagasikara.
Tsy maintsy jerena ny vahaolana maharitra. Izay no nametrahana sekreteram-panjakana miadidy ny fahavitan-tena ara-tsakafo, hijerena manokana ny fampiakarana ny famokarana. Izay no ametrahana ho laharam-pahamehana amin’izao ny fampidirana ny masomboly voafantina toy ny vary. Hatao ny fahazoan’ny Malagasy mifehy ny fambolena masombolin’ny vary safiotra. Anisan’izany koa, ohatra, ny fametrahana fitahirizan-tsakafo raha mbola tsy tonga ny fahavaratra. Rehefa tonga ny fotoam-pambolena sy ny fahavaratra, misy sakafo ho an’ny Malagasy. Eo koa ny fametrahana foibe momba ny fanjarian-tsakafo amin’ny toerana maro manerana an’i Madagasikara. Mba hahazoana mandray an-tanana ny fahasalamana sy ny fanjarian-tsakafo ho an’ny ankizy sy ny fianakaviana izany.
R. Nd.
French