Sombim-baovao

Notontosaina omaly, teny amin’ny Kianjan’ny Elgeco Plus By-pass, ny andro voalohany amin’ny fiadiana ny ho tompondakan’i Madagasikara taranja baolina kitra, sokajy zandriny U20. Nisongadina tanteraka ny ekipan’ny Disciples FC Espoir Analamanga, omaly. Nomontsanin’izy ireo tamin’ny isa 5 no ho 0 ny FC Antsiafabositra avy any Betsiboka.
Tontosa teny amin’ny Kianjan’ny Makis Andohatapenaka, omaly, ny andro fahafolon’ny fiadiana ny ho tompondakan’i Madagasikara, taranja rugby, federaly I,” XXL Top 12”. Nahazo fandresena ny Tam Anosibe, tamin’io fotoana io. Resin-dry zareo tamin’ny isa 24 no ho 19 ny TFMA Ankasina na ny boay kely manohitra. Lavon’ny UASC Cheminots, tamin’ny moka fohy, 28 no ho 27, ny Mang’Art Manjakaray.
Tsy nampoizin’ny rehetra ny vokatra tany Espagne, ny sabotsy lasa teo, nandritra ny fifaninanana espaniola la Liga. Resin’ny Las Palmas, 2 no ho 1, ny FC Barcelone. Mbola mitarika ao amin’ny la Liga moa ny FC Barcelone saingy isa iray sisa no manelanelana azy sy ny Real Madrid, tompondaka farany.