Maro ireo vinan’asa kasain’ireo kandidà hotanterahina mandritra ny fe-potoam-piasany amin’ny maha ben’ny Tanàna azy. Misy anefa ny vina fohy ezaka ao anatin’izany noho ny zava-misy iainan’ny vahoaka. Raha ho an’Antananarivo Renivohitra manokana, laharam-pahamehana ny rano fisotro madio sy ny jiro, izay tena mampijaly ny rehetra ankehitriny. Eo ihany koa ny fifehezana ny fako sy ny fahadiovan’ny tanàna. Ny fandrindrana ny fifamoivoizana sy ny toerana samihafa.
Kandidà manana vina entina mamaly izany i Harilala Ramanantsoa. Misy ny vinan’asa fananganana orinasa mpanodina fako ho angovo. Tetikasa izay lehibe sy miavaka satria, sady hampadio ny tanàna no hampihena ny fiankinandoha amin’ny famokarana herinaratra amin’ny alalan’ny solika. Eo koa ny fanaovana “forages” amina toerana maro eto an-dRenivohitra, izay ho fampanakaikezana ny vahoaka ny rano fisotro madio. Laharam-pahamehana sy tena ilain’ny vahoakan’Antananarivo ireo.
“Efa niasa sy miasa ary mbola hiasa”, hoy ny nambarany ao anatin’izao fampielezan-kevitra izao. Efa nisy famolavolana ny fametrahana ny orinasa mpamadika ny fako ho angovo azo hampiasaina. Tao anatin’
izany no nanaovana fidinana ifotony teny Andralanitra nijerena ireo fako eny an-toerana, fony izy filohan’ny Delegasionina manokana an’Antananarivo (PDS). Efa am-periny ihany koa amin’izao ny fanaovana “forages” ho famahana ny olan’ny rano. Efa nisitraka izany rahateo ny teny Ambohipo.
Lin
French