TSELATRA

Notrongisin’ny fiara 4×4 iray ny andrin-jiron’ny Jirama eny Ankorondrano, omaly. Nandeha mafy hihazo ny lalana mankany Ivandry ity fiara ity kanjo tra-doza tampoka. Tsy vitan’izay fa mbola nifatratra tamina fefy tamin’ny sisin-dalana ny fiara. Potika ny lohan’ny fiara saingy tsy nisy kosa ny aina nafoy na teo aza ny dona mafy.
Naiditra am-ponja vonjimaika eny amin’ny fonjaben’i Tsiafahy, omaly, ny lehilahy iray mpanao trafikana zava-mahadomelina. Mivarotra rongony eny Ampa­sika izy ka teo am-pivarotana no tonga ny polisy nisambotra azy. Nahitana fonosan-drongony marobe tany aminy nandritra ny fisavana azy. Mitohy ny fanenjehana ataon’ny polisy ireo mpivarotra sy mpifoka zava-mahadomelina.
Jiolahy iray naratra niharan’ny fitsaram-bahoaka, teny Fenoarivo, omaly. Teo am-pangalarana bisikileta izy no hitan’ny tompony tampoka ka raikitra ny fifanenjehana. Variana nisotro kafe ilay raim-pianakaviana ka nohararaotiny saika hobataina ilay bisikileta. Na efa naratra mafy aza, tafaporitsaka ihany ilay jiolahy.
Mirongatra ny fanendahana anaty fiara amin’iny Cenam 67 ha iny. Vehivavy iray nandeha taxi-moto no nifanehatra tamin’ny jiolahy ka nianjera avy eny ambony moto mihitsy. Nosintonin’ireo jiolahy ny poketra teny an-tanany. Nianjera vokatry ny herisetran’ireo jiolahy izy sy ilay mpitondra moto. Lasa nitsoaka ireo olon-dratsy rehefa nahazo ny poketrany.