Sehatra iray hisintomana mpizahatany ho tonga eto amintsika ny fitaterana ana habakabaka. Efa nametraka ireo rafitra sy ny fomba ahafahana mifamezivezy amin’ izany ny Aviation civile de Madagascar (ACM). « Atokisan’ ny mpandeha sy ny kaompaniam-pitaterana ana habakabaka iraisam-pirenena ny lanitr’i Madagasikara », hoy ny minisitry ny Fitaterana sy ny famantarana ny toetr’andro, Ramonjavelo Valery, nandritra ny lanonam-pamaranana ny fankalazana ny faha-80 taonan’ ny Organisation de l’Aviation civile Interanationale (OACI), teny amin’ny seranam-piaramanidina Ivato, ny sabotsy teo. Notohizany fa tafakatra 11 ireo kaompaniam-pitaterana avy any ivelany manao sidina eto an-toerana. “Misy ihany koa ireo fiaramanidina manao sidina manokana eto amintsika”, hoy ny tale jeneralin’ny ACM, Damasy Gervais. Midika izany fa manomboka mahazo aina ny sehatry ny fitaterana ana habakabaka amin’izao fotoana.
Ezaka
Manana anjara toerana lehibe ny fisorohana ny lozam-pitaterana ana habakabaka. Hijanona 10 andro eto amintsika, manomboka ny 13 janoary 2025, ireo tomponandraikitra miisa efatra avy amin’ ny OACI, hanara-maso ny ACM. « Antenaina fa hiakatra ambony ny naotin’i Madagasikara taorian’ny fanavaozana sy fanatsarana natao », hoy hatrany ny tale jeneraliny. Tsiahivina fa 43/100 ny naotin’ i Madagasikara ny taona 2013, nanaovana ny fanadihadiana farany.
Henintsoa H.
French