Natsingevan’ny ranomasina, hita faty omaly atoandro, i Gario kely. Natelin’ny ranomasina tao Toamasina io zaza io, ny alahady 08 desambra teo. Nilalao tahaka ny ankizy rehetra izy. Nisy onja nahery tampoka ka voasinton’ny rano ity zazalahy ity sy ny iray hafa. Nikoropaka niantso vonjy ny nanatri-maso. Nokarohina izy roa lahy nanomboka ny tolakandron’ny alahady. Samy nanao ny fomba rehetra mety nahitana ireo zaza roa ireo, ny mpanjono, ny olon-tsotra sy ny tomponandraikitra. Minitra vitsy taorian’ny loza, hitan’ny fokonolona tamin’io andro io, ny iray tamin’ireo roa lahy natelin’ny rano. Tsy afa-niteny, mbola verivery saina izy tamin’ny fotoana nampiakaran’ ny olona azy an-tanety. Tetsy ankilany, nanohy ny fikarohana ilay zazalahy faharoa namany ny sampana mpamonjy voina. Nandroso maizina, tsy hitan’izy ireo io zazalahy atao hoe Gario io. Hitan’ ny fokonolona, omaly, ity farany. Nosarihan’ny mpivoy lakana tamin’ny alalan’ny harato izy. Nentina namonjy ny tranom-paty ny razana. Matetika mampidi-doza io faritra nitrangan’ ny loza io, araka ny fanamafisan’ny loharanom-baovao.
*
Tsiferana R.
French