Notanterahina, omaly, teny amin’ny Lapan’ny Antenimierandoholona Anosikely, ny lanonam-pamaranana ny fivoriana ara-potoana faharoan’ity andrimpanjakana ity. Olom-panjakana maro samihafa no tonga niatrika izany. Anisan’ izany ny avy eo anivon’ny governemanta, ny avy amin’ny HCC, ny HCDDED ary ny avy amin’ny Antenimierampirenena. Ankoatra ny famintinana ireo zava-bita nandritra izay 60 andro nanatanterahana ny fivoriana izay, nasongadin’ny filohan’ny Antenimierandoholona, ny Jly Ravalomanana Richard, nandritra ny fandraisam-pitenenany ny tokony ho fiaraha-miasan’ny ben’ny Tanàna voafidy amin’ny tomponandraikitra eto amin’ny firenena ho tombontsoan’ny vahoaka.
Volavolan-dalàna miisa 12 no nolanian’ny eo anivon’ny Antenimierandoholona nandritra izay fivoriana ara-potoana faharoa izay. Ny volavolan-dalàna mahakasika ny tetibolam-panjakana taona 2025. Teo ihany koa ny momba ny fanavaozana ny rafitra mifehy ity andrimpanjakana ity. Tsy hadinon’ity filoha ity ny nampita hafatra sahady ho an’ireo ben’ny Tanàna ho lany amin’ny maha andrimpanjakana miahy ny vondrom-bahoaka itsinjaram-pahefana ny Antenimierandoholona. « Tokony hiaraka hiasa amin’ny tomponandraikitra eto amin’ny firenena ireo ben’ny Tanàna. Aoka tsy ny tombontsoan’olom-bitsy na ny antoko no jerena fa ny tombontsoan’ny vahoaka », hoy ny Jly Ravalomanana Richard.
Lin
French