“Mbola ambany hatrany ny taham-pandraisana anjaran’ny mpifidy tany amin’ireo biraom-pifidianana narahin’ny Safidy maso. Eny, na niakatra aza izany ampitahaina amin’ny fifidianana kaominaly 2019”.
Io ny fanambaran’ ny Sampana anaraha-maso ny fifidianana, ivon’ny demokrasia ifarimbonana (Safidy), notarihin’ny mpitondra teniny, Razanamahefa Désirée Marie Stella, teny Ambatonakanga, afakomaly, momba ny fizotran’ny fifidianana kaominaly sy monisipaly teo. Nahatratra 39,3% ny taham-pahavitrihana, raha 33,3% izany tamin’ny 2019. Ny taham-pahavitrihana ambony indrindra ary nihoatra ny 45% dia tany amin’ny faritra Androy (54,8%), Fitovinany (47,8%), Atsimo Andrefana (47,4%). Ambany ary latsaky ny 30% ny tany amin’ny faritra Ihorombe (27%), Diana (28,7%).
Mametraka ahiahy momba ny fifidianana kaominaly sy monisipaly 2024 ny Safidy, araka ny fanambarany. Tsy mazava, ohatra, ny fanendrena mpikambana eo anivon’ny rantsamangaikan’ny Ceni, ka mampiahiahy ny amin’ny fahaleovantena sy ny tsy fiandaniana. Manamafy izany ny fanoloana lehibem-pokontany miverimberina rehefa ankatoky ny fifidianana. Nampisavorovoro koa ny fanavaozana miavaka ny lisi-pifidianana tamin’ny alalan’ny fakana ordonansa. Miisa 184 ireo fitarainana voarain’ny Safidy hatramin’ny nanombohan’ny fampielezan-kevitra. Miverimberina hatrany ny amin’ny fandraisan’ny mpiasam-panjakana anjara amin’ny fampielezan-kevitra, ny fanampiana lisi-pifidianana amin’ny alalan’ny ordonansa, ny fahaverezan-jon’ny mpifidy tsy voasoratra anaty lisi-pifidianana, ny fanentsenana vato mialoha tao anaty vata fandatsaham-bato, ny tsy fanaovana fitantana an-tsoratra eo no ho eo.
R. Nd.
French