Naharitra 4 taona ny tetikasa RISE izay nisehatra tamin’ny tontolon’ny fahasalamana, indrindra ny fanaraha-maso ny valanaretina. Nitondra fanatsarana teo amin’ny sehatry ny fikarohana ny tetikasa.
Nifarana ny tetikasa Research, Innovation, Surveillance and Evaluation (RISE), nanampy betsaka ny sehatry ny fahasalamana teto Madagasikara. Tetikasa novatsian’ny USAID vola mitentina 8 tapitrisa dolara.
Niompana tamin’ny fanaraha-maso ny areti-mifindra ary nanampy tamin’ny fisorohana sy ny fitiliana toy ny Covid-19 sy ny pesta.
Nametraka foibe fanaraha-maso biolojika miisa 31 manerana ny faritra 21 ny tetikasa. Nanamafy ny fahaiza-manao tamin’ireo fandaharam-piofanana miisa 30 nokarakaraina. Mpandray anjara miisa 1 200 no nisitraka izany tao anatin’ ny dimy taona. Vehivavy avokoa ny 57% amin’izy ireo ary ny 85% dia mpiasan’ny minisiteran’ny Fahasalamam-bahoaka.
Niompana tamin’ny fikarohana momba ny fomba fiasa sy fikarohana klinika ary fanadihadiana lalina momba ny valanaretina ireo fiofanana ireo.
“Tsy vitan’ny hoe nahatratra ny tanjony ity tetikasa RISE ity fa modely ho an’ireo tetikasa ho avy ihany koa”, hoy i David Parks, tale mpisolo toerana misahana ny sampana fahasalamana eo anivon’ny USAID.
Tanjon’ny tetikasa ny hanatsara ny fandraisana fanapahan-kevitra mifototra amin’ ny fampiasana tahirin-kevitra ara-kalitao momba ny fanatsarana ny fahasalamam-bahoaka indrindra ny mahakasika ny ady amin’ny tazomoka. Eo koa ny fahasalaman’ny reny sy ny zaza ary ny fandraisana an-tanàna ny sehatra ara-pahasalamana amin’ny ankapobeny.
Nisongadina, araka izany, ny asa fikarohana sy ny fanatsarana ny rafitra ara-pahasalamana eto Madagasikara tamin’ny alalan’ny tetikasa natao nandritra ny 4 taona.
Manamafy ny fahavononany hanohy ny fiaraha-miasa amin’i Madagasikara i Etazonia eo amin’ny fanaraha-maso ny valanaretina.
Tatiana A
French