Mahay mozika. Mahay mihira. Mahay mitendry zavamaneno, ny Malagasy. Fony mbola tsy tafaroboka tao anaty mozikam-barotra ny vanim-potoana, vao mainka mitombona ireo. « Mahay mozika ianareo. Tsara be ny mozikanareo, sns », hoy ny vahiny. Tsy mba nanaraka sorapeo na naoty anefa ny Malagasy… Taorian’ ny nidiran’ ny vahiny teto, indray, ny mpitondra fivavahana no tena havanana amin’ny fampiasana ny sorapeo.
Ankehitriny, mbola vitsy ihany ny Malagasy mahay manoratra sy mamaky sorapeo. Ao aza ireo mandà mafy ny amin’ny fampiasana azy io amin’ny fitendrena ny hira malagasy sasany. Mibahan-toerana ny fiheverana fa « an’ny vahiny ny sorapeo ». Hatramin’izao, anefa, mbola ny sorapeo no « fitaovana iraisam-pirenena » ahafahan’ny mozika (hira, zavamaneno…), sy ny mpitendry zavamaneno na ny mpihira mifanakalo.
Tsy mbola manan-danja loatra amin’ny Malagasy ny fahaiza-mifehy ny sorapeo noho izy tsy nobeazina tamin’ izany. Mitoetra hatrany ilay fiheverana fa «na hira malagasy izao aza no tendrena, raha vao mampiasa sorapeo dia manjary hira vahiny» ?
HaRy Razafindrakoto
French