TSELATRA

Lehilahy nanolan-jaza tsy ampy taona nalefa eny Tsiafahy ary lehilahy iray hafa mpanolana olona mitovy fananahana aminy notanana eny Anjanamasina, ny 20 desambra teo. Niara-voasambotry ny zandary tao Ambohimangakely izy roa lahy. Zazalahy 4 taona nampiharan’ny iray ny filan-dratsiny. Tratra io nahavanon-doza io ka nitoroka ny namany izay voalaza fa nampianatra azy izao fihetsika mamoafady izao.
Raim-pianakaviana iray naratra lasibatry ny jiolahy teo amin’ny tongony tao Ambodiala, distrikan’i Manandriana, ny alin’ny 21 desambra teo. Manaraka fitsaboana eo anivon’ ny CHRD Manandriana izy amin’izao fotoana, tsy atahorana ny ainy. Nandositra ireo nahavanon-doza.
Lavon’ny balan’ny polisy tao Bekomondro, fokon­tany Tsongobory, ny alahady teo, ny jiolahy raindahiny amin’ ny fanafihana mitam-piadiana mahery vaika ao Toliara. Maro ny fitairanana voarain’ny polisy momba ny trangana fanafihana sy fanendahana ao an-dRenivohitr’i Toliara. Nanao hetsika manokana momba izany ny polisy. Anisan’ireo lasibatr’ireo
jiolahy ireto ny mpanolotsain’ny Tanàna ao Toliara. Basy iray tratra teny amin’ilay jiolahy.