Fiara roa samihafa, nahatraran’ny mpitandro filaminana zana-tsokatra an-jatony, teny Antehiroka, ny 24 desambra teo. Hiakatra fampanoavana anio ireo voarohirohy.
Nogiazan’ny zandarimaria ireo zana-tsokatra mitotaly 112 nasitrika tao anaty fiara miisa roa teny Antehiroka, afakomaly. Nanao fisavana tampoka nandritra ny alin’ny 24 desambra ny mpitandro filaminana. Voasakana ny fiara iray voalohany. Nampiahiahy ny mpanao fisavana ny fihetsiky ny mpitondra izany. Nosavaina, nahitana sokatra miisa 107 tao anatin’ny fiara. Natao ny fanadihadiana, nokasaina entina antsokosoko any ivelany ireo karazam-biby arovana sy ahina ho lany tamingana ireo. Ankoatra io, nitohy ny fanaraha-maso ireo mpivezivezy amin’ny alina ataon’ny zandary teny an-toerana. Fiara iray hafa, nahatrarana sokatra miisa 5. Nasitrika anaty sakaosy, mbola nokasaina haondrana koa ireo harem-pirenena ireo. Nentina nihazo ny tobin’ny zandarimaria avy hatrany ireo nahatrarana izany. Notanana ireo sokatra mitotaly 112. Niroso tamin’ny famotorana lalina, hatolotra ny fampanoavana anio ny raharaha. Marihina, voararan’ny lalàna ary iharan’ny sazy enjana ireo minia mikasa na manondrana antsokosoko ny karazam-biby arovana toy ireto tratra teny Antehiroka, afakomaly ireto.
Tsiferana R.
French