Tafaverina soa aman-tsara anivon’ny fianakaviany ireo roa lahy nentin’ny mpaka an-keriny tao Andohambato, kaominina Manakana, ny 26 desambra teo. Nalain’ny olon-dratsy nataony takalonaina ny mpiasa tamina kariera tao an-toerana. Mitrandraka volamena ireo lasibatra ireo. Nitondra fitaovam-piadiana ireo tsy valahara ka tsy sahy nanohitra ny andian-dehilahy voatafika. Naharay fampandrenesana ny zandarimaria. Natao hazalambo ireo mpaka an-keriny. Nanao fanamiana mpitandro filaminana ity farany saingy mailo ny zandary. Raikitra ny fifampitifirana. Nilanja MAS 36 niampy basim-borona ireo dahalo. Vaky nandositra ireo mpaka an-keriny rehefa tsy naharesy tosika ny mpitandro filaminana avy eo anivon’ny vondron-tobim-paritra Andriamena. Nogiazana avokoa ny ody ratsy niampy ny fitaovana nampiasan’ireo dahalo izay tavela teo amin’ny toerana nifandonany tamin’ny zandary.
Tsiferana R.
French