Niara-namoy ny ainy ny renim-pianakaviana iray sy ny zanany lahy vokatry ny ora-nikija tao Fenoarivobe, omaly maraina. Nentin’ny rano izy mianaka.
Ora iray taorian’ny nahalasa ny rano azy, hitan’ ny mpitandro filaminana sy ny fokonolona ny vatana mangatsiakan’ny renim-pianakaviana iray, 34 taona, nentin’ny rano tampoka, tao Ambohimanatrika, fokontany Ankadibevava, kaominina Fenoarivobe, omaly. Natsingevan’ny rano adiny iray taorian’io, hita koa ny zanany lahy vao 13 taona monja. Miaina ambanivohitra, niala maraina izy mianaka ireo. Tsy nanampo ny fiakaran’ny rano nateraky ny ora-nikija anefa izy ireo. Nandalo ny lalana fampiasany andavanandro, nentin’ny rano tampoka izy mianaka vao mangiran-dratsy tamin’ny 4 ora. Nampandre ny zandarimaria miasa eo anivon’ny zana-tobim-paritra ao an-toerana ny fianakavian’ny lasibatra. Nifampitadiavana ireo mpianaka natelin’ny rano.
Nivoa-dra
Mbola tao anatin’ny haizina, nananosarotra ho an’ireo fianakaviany ny fikarohana azy mianaka tamin’ny fotoana nitrangan’ny loza. Ora iray taorian’io, nanomboka nazava ny andro sady nifanome tanana ny mpiara-monina eo anivon’ny fokontany Ankadibevava. Nadonadonan’ny rano tamin’ny morona, naratra ary nivoa-dra ny oron’ilay renim-pianakaviana tamin’ny fotoana nahitana ny vatana mangatsiakany. Ankoatra azy, naratra mafy koa, ny lohan’ilay zanany ka heverina ho antony nitarika ny fahafatesan’izy mianaka. Manoloana izao tranga izao, manentana ireo mponina na ambanivohitra, na an-dRenivohitra ny zandarimaria mba hitandrina hatrany manoloana ny fiakaran’ny rano rehefa vanim-potoana fahavaratra tahaka izao.
Tsiferana R.
French