Nitsirara tamin’ny tany, renim-pianakaviana iray, 60 taona, namoy ny ainy tao Tanambao Toamasina, omaly. Mpandalo no nahita azy. Tsy nihetsika intsony ary nitsotra eo amin’ny tany izy. Nampiahiahy ny manodidina ny fahitana ilay ramatoa izay tsy namaly intsony ny fanairan’ny manodidina azy. Tsy nisy aina intsony, efa maty ilay ramatoa. Niantso ny tomponandraikitry ny fahasalamana hanao ny fizahana ny vatana mangatsiaka ny nanatri-maso.
Tsy nahitana ratra na mangana ny faritry ny vatany, araka ny fizahan’ny BMH. Nanamafy ny solontenan’ny mpitsabo nizaha ny razana fa nitarika ny fahafatesan’ilay renim-pianakaviana ny hanoanana tafahoatra nahazo azy. Ahina ho karazan’olona mpatory an-dalana izy. Nitady ny fianakaviany ny mponina saingy tsy fantatra mazava ny momba azy. Voatery nentina nihazo ny tranom-paty ilay vatana mangatsiakany.
Tsy vao sambany, efa matetika nitrangana fahatesan’ olona tampoka nateraky ny hanoanana tahaka izao ao Toamasina, tamin’ny taona 2024. Nandritra ny fankalazana ny faran’ny taona sy ny voalohan’ny volana janoary 2025, nahatratra 99 ireo nizaha fahasalamana teo anivon’ ny hopitalibe ao Toamasina. 53 tamin’izy ireo naiditra hopitaly. Ratra nateraky ny zava-maranitra ny 21. Miisa fito ny ratra nateraky ny fianjerana eny amin’ny lalam-bahoaka.
Sajo
French