Farafangana: mpanapa-doha telo lahy notanana am-ponja

Niakatra fitsarana ny 3 janoary teo, niara-notanana am-ponja ireo telo lahy tompon’ antoka tamin’ny fanapahan-doha tao Farafangana.

Dahalo telo lahy, nisandoka ho jama tao amin’ny tanànan’Anam­ba­kaka Iabohazo, distrikan’i Fara­fangana, ny 18 desambra 2024 lasa teo. Nalain’izy ireo an-keriny, tamin’izany, ny lehilahy iray fantatra amin’ny anarana hoe Dao. Notapahin’ireo tsy valahara ny lohan’io olona io. Nisy naharaka anefa ny asa ratsy nataon’ireo mpanapa-doha izay nisitrika tao anaty ala kafe. Fantatr’io nahita ny zava-nitranga io avokoa ny roa lahy tamin’ireo nahavanon-doza. Tsy sahy niantso vonjy izy noho ny tahotra. Nigadona tao amin’ny tanànan’i Rano­mena Bezobaka, kaominina Vohitromby, ny lehilahy iray nitady mpividy lohan’olona, ny 21 desambra. Niandry kendry tohina ny zandary rehefa nahazo loharanom-baovao avy tamin’ny tsara sitrapo momba io tranga io. Voa­sambotra ireo roa lahy tompon’antoka tamin’ny famonoana sy ilay lehilahy iray nitady mpividy lohan’olona. Niakatra fampanoavana ny raharaha ka voatazona vonjimaika ao amin’ny fonjabe Farafangana izy telo.

Tsiferana R.