Tselatra

Namoy ny ainy ny lehilahy iray lasan’ny ranomasina tao Depot 1, Toamasina, omaly atoandro. Nifa­mon­jen’ny mponina manodidina izy. Tafavoaka tao anatin’ny rano ny vatany saingy tsy tana ny ainy.
Raim-pianakaviana iray maty lasan’ny ranontrambo tany Andranomisa, raha avy any Marotsipoy, disitrikan’Anjozorobe, ny voalohan’ny taona 2025 lasa teo. Olona fito mianaka, avy namonjy fahoriana tany amin’io toerana io izy ireo tamin’io fotoana io.
Tokantrano miisa dimy nasesin’ny jiolahy tao Mahavoky, kaominina Mahajanga, ny alin’ny sabotsy 4 janoary teo. Nanararaotra ny orambe ireo olon-dratsy. Ren’ny tompon-trano ny fisian’ireo olon-dratsy ireo tamin’ny 2 ora maraina. Nodarohany tamin’ny angady ny lohan’ny iray tamin’ireo mpangalatra ka vaky nandositra.
Omby 28 latsaka teny am-pelatanan’ny dahalo nandritra ny fifandonana tamin’ny mpitandro filaminana tao Anketsa, Andrefan’Ambatoloaka, distrikan’Andilamena, ny 3 janoary teo. Nentin’ireo olon-dratsy ny omby am-polony, nanara-dia ny zandary sy ny fokonolona. Raikitra ny fifandonana ka nandositra ireo mpandroba. Tavela ny omby.