Mitombo hery hatrany ilay faritra andro ratsy ao amin’ny ranomasimbe Indiainina, araka ny tatitra nataon’ny mpamantatra ny toetry ny andro etsy Ampandrianomby. Heverina fa hivadika ho rivodoza anio alina ity andro ratsy ity ka hitondra ny anarana hoe : Dikeledi. Ho lasa rivodoza mahery vaika izy any an-dranomasina any. Hanambana ny tapany avaratra atsinanan’ny Nosy ity rivodoza ity, amin’ny faran’ny herinandro, amin’ny tanjaka Forte Tempête Tropicale na Cyclone Tropical.
Tokony hampihatra ny fepetra mahakasika ny filazana fanairana miloko maitso avy hatrany ny mponina amin’ny faritra Diana, Sava ary Ambatosoa.
Ireo mpampiasa ranomasina eo anelanelan’ny Cap d’Ambre sy Vatomandry dia tokony ho tafaverina an-tanety ny zoma hariva ary tsy hiandriaka intsony mandra-pahalasan’ny loza.
Ho an’ny rehetra, mila manaraka mandrakariva ny toromarika omen’ny manam-pahefana isan-tokony.
Omaly maraina, tany amin’ny 2456 km atsinanan’Antalaha no nisy ny foiben’ilay andro ratsy ary efa nivadika ho dépression tropicale izy. 55 km/ora ny rivotra miaraka aminy izay arahina tafiotra 75 km/ora manakaiky ny foibeny.
Mahakisaka miakandrefana haingana izy ka nahafaka 35 km/ora. Tombanana hitombo hery hatrany izy ity ka hivadika ho rivodoza mahery vaika.
Tatiana A
French