Tsy mety tapitra ny fanondranana antsokosoko sokatra mankany Azia. Tratran’ny Sampandraharahan’ny ladoany teny Ivato ny teratany sinoa telo lahy nitondra sokatra miisa 105, omaly.
Tsy mety fay! Mitohy ny fikasana hanondrana antsokosoko ny harem-pirenena voajanahary mankany ivelany. Mpandeha teratany sinoa telo mirahalahy no nitondra zana-tsokatra miisa 105, ny talata 14 janoary 2025 tolakandro teo, teny amin’ny seranam-piaramanidina iraisam-pirenena Ivato. Saika handeha hiondrana tamin’ny sidina ET 852 an’ny kaompania Ethiopian Airlines izy ireo, mandalo atsy Addis-Abeba ary ho any Shangai Sina. Hitan’ny Sampandraharahan’ny fadin-tseranana eny Ivato tao anatin’ny valizin’izy telo lahy teo amin’ny fitaovam-pitiliana « scanner » ireo sokatra miisa 105 saika haondrana ireo. Notazonina avy hatrany izy telo lahy natao fanadihadiana.
Vao tsy ela akory, ny alahady 12 janoary, no tratran’ny zandary ny roa lahy tanaty fiara 4×4, nitondra zana-tsokatra miisa 24 sy rongony 120 kilao tanaty gony miisa 10, tany Andohasatra, kaominina Tameantsoa, distrika Betioky Atsimo.
Ankoatra ireo, tratran’ny mpisafo alan’ny Madagascar National Parks (MNP), mpitantana ny valan-javaboahary Cap Sainte-Marie, any Vohimena, distrika Tsihombe, ny lehilahy iray avy any Toliara, nitondra sokatra miisa 68, ny 28 desambra 2024. Hafa koa, teratany tanzaniana nahatrarana sokatra miisa 800 tany Mahajanga, ny 27 desambra. Manampy ireo, solombavambahoaka iray sy ny mpiara-miasa aminy efa-dahy, ny 24 desambra 2024.
Mazava ny lalan’ny tambajotra
Raha aravona, miisa 997 ny zana-tsokatra tratra tamin’ny toerana telo samy hafa. Misy ny tratra tany am-potony, any amin’ny toerana voajanahary fonenany, eo ny teny an-dalana, misy ny tany amin’ny tanàn-dehibe, eo ny teny amin’ny seranam-piaramanidina ary nisy koa ny efa tany ivelany, any Azia. Mazava ny soritry ny lalana handehanan’ny sokatra, ilazana fa tambajotra mihitsy ireo mpanao trafika sokatra eto amintsika.
Njaka Andriantefiarinesy
French