Mihodina daholo ny gropy miisa 4 any Andekaleka satria nirotsaka ny orana. Foana, araka izany, ny fanapahan-jiro na ny delestazy eto amin’ny tambajotra Antananarivo sy ny manodidina (RIA). Manamarika ny Jirama, fa fanapahana ara-teknika no atao raha misy ny jiro tapaka.
Hampiakarina ny vidin’ny trondro raisin’ny kaoperativa Fifimpava amin’ny mpanjono any amin’ny farihy Andranobe Atsinanana, fokontany Ambohitsokina Antsirabe I. Tanjona ny hanatsarana ny kalitaon’ny trondro miakatra sady hitsinjovana ny mpanjono madinika. Tinapaka izany nandritra ny fivoriamben’ny VOI Tamia, ivondronan’ny mpanjono.
Nomena tranon-tantely miisa 10, masomboly vary X265 sy zezika ary zanak’akoho 300 ny tantsaha any amin’ny fokontany Ambohimandroso, faritra Fitovinany. Nanatanteraka izany, ny 9 sy janoary teo, ny tomponandraikitry ny Fambolena sy ny fiompiana (DRAE) any an-toerana. Tanjona ny hiatrehan’izy ireo ny fiovan’ny toetr’andro, ny doro tanety sy ala.
Azo hahodina indray ho vokatra vaovao ny plastika, toy ny koveta, siny, kojakoja ao an-trano, sns. Orinasa misehatra amin’izany ny SFOI eto Antananarivo. Nijery ifotony ny vokatra sy ny fomba fiasany ny minisitry ny Tontolo iainana, Andonirina Max Fontaine, omaly. Miteraka asa ho an’ny olona maro izany sady mampiakatra ny fitomboan-karena.
French