Tanjona ho an’ny federasion’ny Karate do malagasy (FKM) ny hisehatra eo amin’ ny fifaninanana iraisam-pirenena bebekokoa amin’ity taom-pikatrohana 2025 ity. Io no nohamafisin’ny filohan’ny federasiona, Ratefinanahary Emile, ny faran’ny herinandro teo, tetsy amin’ny ANS Ampefiloha, nandritra ny famaranana ny fampivondronana tapany voalohany ho an’ny mpikatroka sokajy Cadets, Juniors ary Seniors. Mba hahafahana manatratra izany tanjona izany, hampitomboina ireo hiatrika ny fifaninanana kaontinantaly mba hananana vintana maromaro hahazoana tapakila hiatrehina ny fiadiana ny tompondaka maneran-tany. Araka izany, Malagasy mpikatroka 20 mianadahy no kasaina hampandraisina anjara mandritra ny fiadiana ny tompondakan’i Afrika, sokajy Cadets, Juniors ary Seniors, hatao any Nizeria, ny 25 hatramin’ny 27 jolay ho avy izao. Amin’io fifaninanana afrikanina io no hametrahan’ny federasiona ny heriny rehetra mba hahafahan’ireo atleta malagasy mahazo tapakila hiatrehana ny fiadiana ny tompondaka maneran-tany. Tsy vitan’ny federasiona samy irery anefa izany fa miantso fanohanana izy ireo hiaraka hifarimbona, anisan’izany ny fanjakana malagasy sy ireo mpiara-miombon’antoka ary ny fikambanan’ny ray aman-dReny.
Any Antsirabe sy Ambositra ny fampivondronana faharoa
Tsiahivina fa nifarana ny alahady lasa teo ny tapany voalohany tamin’ny fampivondronana ireo mpikatroka hitsongana izay ho ekipa nasionaly, sokajy Cadets, Juniors ary Seniors, izay natao teto Antananarivo. Any Antsirabe sy Ambositra kosa no hanatanterahina ny fampivondronana faharoa, raha ny fandaharam-potoanan’ny FKM.
Mi.Raz
French